Чиа семки: Суперхрана или скриен ризик? Што се случува ако претерате

Иако чиа семките важат за „суперхрана“ поради богатството со влакна, омега-3 масни киселини и минерали, експертите предупредуваат дека нивната прекумерна или неправилна употреба може да доведе до сериозни здравствени проблеми. Како што наведува магазинот Health, несаканите ефекти се движат од дигестивни тегоби до ризик од гушење и нарушена апсорпција на хранливи материи.

Само две лажици чиа семки обезбедуваат до 40% од дневната потреба од растителни влакна, што кај некои луѓе може да предизвика надуеност, болки во стомакот, запек или дијареја, особено ако внесот не се зголемува постепено и без доволно течности.

Особено опасно е консумирањето суви чиа семки, бидејќи тие впиваат течност и значително набабруваат, што може да доведе до гушење, особено кај лица со потешкотии при голтање.

Дополнително, чиа семките содржат фитинска киселина, која може да ја намали апсорпцијата на минерали како калциум, железо и цинк, а високата содржина на влакна може да влијае и на дејството на одредени лекови – особено оние за дијабетес и крвен притисок.

Кај лица со бубрежни заболувања или историја на бубрежни камења, поради оксалатите, се препорачува особена претпазливост. Иако ретки, можно е и појава на алергиски реакции, особено кај лица чувствителни на сусам или јаткасти плодови.

Заклучокот на експертите е јасен: чиа семките се здрави – но само ако се консумираат умерено и правилно.