Canva отпушта 1.271 луѓе, 22 отсто од персоналот: првото забавување за десет години го плаќаат вработените, а трошоците за ВИ растат

Canva, платформата за дизајн со која стотици милиони луѓе прават постери, презентации и објави, отпушта 1.271 луѓе, односно 22 отсто од персоналот. Причината ја кажа самата компанија: растот, за прв пат во последните десет години, забавил.

Соосновачката и извршна директорка Мелани Перкинс на вработените им испрати писмо што звучи како сите писма од овој вид. „Во изминатите тринаесет години, од сон во презентација за инвеститори направивме платформа што ја користат стотици милиони луѓе“, пишува таа, за веднаш потоа да додаде дека „успехот во првото поглавје не гарантира успех во следното“ и дека ова е „најтешката година досега“.

Што се менува, освен бројот на луѓе? Тимовите за производ, раст и платформа се спојуваат во еден, за да има помалку триење во комуникацијата. Компанијата се откажува и од тесната специјализација, што на човечки јазик значи дека тие што остануваат ќе добијат повеќе задачи. Работата од дома се скратува – се преминува на хибриден модел, со неколку дена неделно во канцеларија.

Позадината е поинтересна од писмото. Canva развива сопствени ВИ-модели за да ги намали трошоците и зависноста од туѓите, но трошоците за вештачка интелигенција толку нараснаа што компанијата мораше прогнозата за раст на приходите да ја спушти од 30 на 20 отсто. Раните инвеститори уште порано годинава ја намалија проценетата вредност на компанијата на околу 35 милијарди долари (околу 31 милијарда евра).

А конкуренцијата не доаѓа само од други стартапи. ChatGPT и Gemini денес составуваат постер или презентација од една реченица. Иронијата е тешко да се промаши: компанијата што на секого му даде алатка да прави дизајн без дизајнер сега гледа како чет-ботовите го прават тоа без неа. Колку други компании што пораснаа на ветувањето „лесно за секого“ ќе бидат следни?