12 ГОДИНИ ЗА 57 КИЛОМЕТРИ АВТОПАТ – ДАЛИ ВАКА МАКЕДОНИЈА ОДИ НАПРЕД?

Изградбата на автопатот Кичево – Охрид започна во февруари 2014 година, а по 12 години и 8 месеци, проектот сè уште не е целосно завршен. За само 57 километри автопат се сменија неколку влади, министри и директори, но ветувањата за негово завршување останаа неисполнети.

ВМРО-ДПМНЕ управува со проектот вкупно 5 години и 7 месеци, додека СДСМ беше на власт 7 години и 1 месец.

Првично планиран да чини околу 375 милиони евра, автопатот достигна договорна вредност од околу 598 милиони евра.

Дали вака Македонија оди напред? Дали ова е пример за одговорно трошење на јавните пари?

Додека државниот долг расте, а граѓаните ги чувствуваат последиците од економските проблеми, милиони евра се врзани во инфраструктурен проект што со години ги пробива роковите.

И по 12 години и 8 месеци изградба, стотици милиони потрошени евра и безброј ветувања од различни влади, автопатот Кичево – Охрид сè уште не е целосно завршен, а граѓаните и понатаму го чекаат неговото конечно пуштање во употреба.

Прашањето веќе не е само кога ќе биде завршен автопатот, туку кој ќе понесе одговорност за доцнењето, дополнителните трошоци и неефикасното управување со јавните средства.