Пикот на сезонскиот грип се очекува во наредните две до три недели, изјави денеска министерот за здравство Азир Алиу. Тој посочи дека во овој период секоја година се бележи зголемување на бројот на пациенти кои бараат здравствени услуги поради симптоми на грип, но дека моменталната состојба не е алармантна.

– Во моментов нема зголемен број заболени за да може да кажеме дека ситуацијата е поразлична или полоша во споредба со претходните години. Сè уште не сме го достигнале пикот на сезонскиот грип за да правиме соодветна компарација, изјави Алиу.

Министерот истакна дека годинава е постигнат значаен напредок во однос на вакцинацијата против грип.

– Задоволство ми е да информирам дека оваа година, за првпат, 77.000 граѓани се вакцинираа против сезонски грип. Тоа е најдобриот и најефикасниот начин за заштита на организмот од компликации поврзани со вирусот, нагласи министерот.

Според неговите информации, во моментот останале уште околу 3.000 дози вакцини против грип.

– Граѓаните не треба да се пријавуваат преку системот за вакцинација. Доволно е директно да се јават во здравствените установи каде што може да ја примат вакцината. Ова е особено важно за чувствителните категории – постарите лица, бремените жени и здравствените работници, додаде Алиу.

Изјавата беше дадена по прес-конференцијата организирана по повод кампањата за подигнување на свесноста за опасностите од употребата на пиротехнички средства.