Германската индустрија се соочува со сè подлабока криза, откако „Роберт Бош“ (Robert Bosch GmbH) најави укинување на 13.000 работни места, што претставува околу 3% од глобалната работна сила на компанијата.

Причините за овие големи кратења се повеќеслојни:

• пад на побарувачката за автомобили,

• високи трошоци за работна сила и енергија,

• силна конкуренција од брзорастечките кинески производители на електрични возила,

• бавен премин кон електромобилноста во Европа.

Во изминатите две години, германската автоиндустрија изгуби околу 55.000 работни места, а експертите предупредуваат дека до 2030 година бројката може да достигне речиси 100.000.

Проблеми и конкуренција
Големите германски компании како „Фолксваген“, „Порше“, „БМВ“ и „Мерцедес“ се под притисок поради слабата продажба, царините на САД и конкуренцијата од Кина, особено од „BYD“, кој доминира на кинескиот пазар и навлегува сè повеќе во Европа.

Истовремено, производителите на делови и добавувачите, како „Континентал“, „Шефлер“ и „ZF“, се приморани да кратат трошоци, иако цената на суровините постојано расте.

Притисок врз владата
Експертите предупредуваат дека структурните промени стигнуваат до „срцето“ на германската индустрија. Тие бараат државата да поддржи преквалификација на работниците, особено кон секторите во раст како одбранбената индустрија.

Министерката за економија на Баден-Виртемберг, Никол Хофмајстер-Краут, ја нарече веста од „Бош“ „аларм за индустриското срце на Германија“. Таа порача Берлин и Брисел да усвојат поповолни политики за бизнисот и побара укинување на целта на ЕУ за постепено исфрлање на моторите со внатрешно согорување до 2035 година.

„За нашата автоиндустрија е пет минути по полноќ,“ предупреди таа.