Владејачката партија ВМРО-ДПМНЕ ги обвини поранешните функционери на СДСМ за директна поврзаност со случајот со запленетата дрога, повикувајќи се на фотографии кои ги поврзуваат клучни лица од претходната власт со сопственикот на компанијата „ЦБД Медплант”.

Според соопштението на ВМРО-ДПМНЕ, во јавноста се појавиле фотографии кои ги демантираат претходните изјави дека не постои никаква врска со вистинскиот сопственик на фирмата од која потекнува запленетата дрога.

„Откако со денови се обидуваат да ја релативизираат аферата со запленетата дрога, вистината излезе на виделина”, се наведува во соопштението на партијата.

Од друга страна, од опозицијата тврдат дека станува збор за политичка манипулација и бараат извинување за, како што велат, лаги и клевети. Поранешниот премиер јавно побара извинување, заканувајќи се со тужба доколку не биде добиено во законскиот рок.

Според тврдењата изнесени на прес-конференција во Собранието, повеќе од две третини од 27 тони запленета дрога потекнуваат од фирма поврзана со претходната власт. Наводно, 19 тони марихуана биле доставени до фабрика во Скопје од компанија која добила лиценца за одгледување медицински канабис во 2020 година.

ВМРО-ДПМНЕ повикува Јавното обвинителство да ја испита можната поврзаност на поранешни функционери со овој случај.