Американската војска му соопштила на претседателот Доналд Трамп дека е целосно подготвена за извршување воена операција против Иран на 21 февруари, оваа сабота. Високорангирани службеници за национална безбедност го известиле Трамп за оперативната подготвеност, но конечната одлука сè уште не е донесена.

Како што пренесуваат американски медиуми, во Белата куќа се одржуваат „динамични и тековни” дискусии за ризиците од ескалација и политичко-воените последици од евентуален напад. Еден претседателски советник изјавил дека постои 90% веројатност дека САД наскоро ќе нападнат, опишувајќи ја операцијата како „поприлична на полномасштабна војна” отколку на ограничени прецизни удари.

Во меѓувреме, Пентагонот привремено префрли дел од своите трупи од Блискиот Исток кон Европа и САД, како дел од подготовките. Портпаролката на Белата куќа, Каролин Левит, изјави дека постојат „многу причини и аргументи за напад на Иран”, но дека Трамп моментално ги приоритизира дипломатските решенија.

Извори од администрацијата укажуваат дека разговорите се интензивни, а советниците ги проценуваат можните последици од воена акција наспроти дипломатските опции. Трамп сè уште не донел финална одлука, но воената машинерија е подготвена да дејствува по негова наредба.

Израел, кој долго време го смета Иран за својот главен противник, веќе прогласи максимална воена подготвеност и може да се приклучи на евентуалните операции. Израелските безбедносни кругови се надеваат дека масовна акција би можела да го урне иранскиот режим и да ги уништи неговите нуклеарни и ракетни програми.

Тензиите меѓу Вашингтон и Техеран се на највисоко ниво во изминатите неколку години, а наредните денови ќе покажат дали дипломатијата сè уште може да го спречи вооружениот судир или САД ќе преземат воена акција на Блискиот Исток.