Од 12 октомври сите македонски граѓани кои влегуваат во земји-членки на ЕУ ќе мора да остават биометриски податоци – отпечаток од прст и фотографија. Новите процедури ќе важат на сите гранични премини и аеродроми при влез во Шенген-зоната.

Процесот ќе се одвива во четири фази и во првите 30 дена ќе бидат опфатени само 10% од патниците, но постепено сите граѓани ќе мора да се регистрираат во системот.

Евроамбасадорот Михалис Рокас објасни дека регистрацијата ќе биде еднократна – при следните влегувања патниците ќе може да користат автоматски врати на аеродромите и процедурата ќе биде побрза.

Најголемиот предизвик за македонските патници ќе бидат граничните премини со Грција и Бугарија, каде и досега имаше километарски колони. Според најавите:

• Грција ќе го имплементира системот веднаш.

• Во Бугарија прво ќе стартува на Деве Баир и Ѓушево кон крајот на октомври, а потоа и на останатите премини до крајот на годината.

Новите правила нема да важат за деца до 12 години.Во 2026 ќе почне да функционира и ЕТИАС-системот, кој ќе бара онлајн регистрација пред патување во Европа. Таа ќе чини 20 евра и ќе важи три години, освен за лица под 18 и над 70 години.