Претседателот Доналд Трамп одржа историски говор пред Конгресот на Соединетите Американски Држави, говорејќи еден час и 47 минути и со тоа го сруши рекордот на Бил Клинтон, постановувајќи го нajдолгиот говор за состојбата на нацијата во историјата на телевизиската ера.

„Нашата нација се врати — поголема, подобра, побогата и посилна од кога било досега”, рече Трамп во воведот, прогласувајќи дека земјата е „на половина пат кон историски пресврт”. Говорот беше структуриран повеќе како митинг отколку како традиционален политички извештај — со силни политички напади и постојано аплаудирање од страна на Републиканците, кои станаа над сто пати.

Трамп се пофали со намалената инфлација, рекордно високите берзи, намалените цени на лековите и затворените граници за нелегална миграција. Изјави дека ги наследил „нација во криза, стагнирачка економија и отворени граници”, и дека неговата администрација „ги исправила работите” за кратко време.

Значаен дел беше посветен на новите царини. По одлуката на Врховниот суд кој ги блокираше претходните реципрочни царини, Трамп најави нов пристап базиран на поинаква правна основа. Сугерираше дека приходите од царини со тек на времето би можеле делумно да го заменат данокот на доход.

Демократите претежно го бојкотираа настанот, а оние кои беа присутни речиси и не аплаудираа. Еден конгресен претставник беше изведен од салата поради прекинување на претседателот. Говорот дојде во момент кога само 36% од американските граѓани го одобруваат неговиот економски пристап, според актуелните истражувања.