Турската одбранбена служба соопшти дека на 9 март НАТО системите пресретнале балистичка ракета испукана од Иран преку турскиот воздушен простор. Тоа е вторат ваков инцидент за само неколку дена: на 4 март беше пресретната друга иранска ракета која минала преку воздушните простори на Ирак и Сирија пред да стигне до Турција. Втората ракета падна во поле во близина на Газиантеп, на југот на земјата.

Иранскиот претседател Масуд Пезешкијан во телефонски разговор со турскиот претседател Реџеп Таип Ердоган изјавил дека „Иран не е изворот на ракетите кои влегле во турскиот воздушен простор” и ветил сеопфатна истрага за инцидентите. Ердоган изразил незадоволство и нагласил дека Иран не смее да таргетира трети, братски нации во регионот, бидејќи тоа „нема да биде корисно за никого”.

Турскиот претседател повторно го потенцира желбата на Анкара да остане неутрална во конфликтот. „Нашата главна цел е земјата да ја одржиме настрана од овој оган. Безбедноста и мирот на нашите 86 милиони граѓани е наш апсолутен приоритет”, изјавил Ердоган. Тој додаде дека активно разговара со повеќе светски лидери во обид да ги намали тензиите и истакна дека нема да прифати нарушувања на турскиот суверенитет.

Турскиот министер за надворешни работи Хакан Фидан упати директна предупреда кон Техеран: „Не сме земја која лесно се предизвикува. Им рековме на нашите ирански пријатели дека едно е ако оваа ракета случајно залута, но ако продолжи, нека внимаваат.” Инцидентот со НАТО пресретнувањето покренува прашања и за потенцијална примена на членот 5 за колективна одбрана, иако Алијансата засега не дала официјален коментар во таа насока.