Рускиот претседател Владимир Путин изјавил дека Русија е подготвена да ја снабдува Европа со нафта и природен гас, под услов европските земји да покажат интерес за долгорочна соработка без политички притисок врз Русија. „Ако европските компании и купувачи решат да се реориентираат и да ни обезбедат стабилна соработка без политички притисок, само напред. Никогаш не одбивале. Спремни сме да соработуваме со Европејците, но треба сигнали дека тие го сакаат тоа”, изјавил Путин на телевизиска средба.

Изјавата доаѓа во момент кога светскиот пазар на нафта се соочи со нагло зголемување на цените. Суровата нафта за прв пат од 2022 година го надмина прагот од 100 долари по барел, достигнувајќи речиси 120 долари пред да се стабилизира. Причина е конфликтот во Иран и заканата по слободниот транзит низ Хормускиот теснец, кој е клучен пат за повеќе од 20 отсто од глобалното снабдување со нафта.

Русија во моментов продолжува да снабдува со нафта доверливи азиски партнери, а меѓу европските земји исклучок се Унгарија и Словачија, кои примаат руска нафта преку нафтоводот Дружба, иако транзитот преку Украина е суспендиран. ЕУ воведе забрана за увоз на руска нафта по море во 2022 година по инвазијата на Украина.

Паралелно, американската администрација, исто така, разгледува делумно олеснување на санкциите за руска нафта со цел да ги стабилизира глобалните цени на енергенсите. Ако двата потега – руската понуда и американското олеснување – се остварат истовремено, тоа би значело значајна промена во глобалната енергетска карта, со далекусежни последици за геополитичките односи меѓу Западот и Москва.