Потпретседателот на Владата и министер за транспорт и врски Александар Николоски одржа повеќе средби на високо ниво во Стејт Департментот на САД, каде разговараше за засилување на односите меѓу Македонија и Соединетите Американски Држави.

Николоски истакна дека САД се стратешки партнер број еден на Македонија и земјата која дава највеќе поддршка. Во центарот на дискусиите беа инфраструктурните проекти, особено Паневропскиот Коридор 8 и Паневропскиот Коридор 10, кои минуваат низ Македонија и играат значајна улога во регионалната поврзаност и економскиот развој.

Дополнително, беа разгледани можностите за склучување трговски договор кој би овозможил поголема деловна активност и поголема трговска размена меѓу двете земји. „Стратешкото партнерство треба да значи просперитет, напредок, безбедност и засилување на прозападните вредности во Македонија”, изјави Николоски.

Во рамките на посетата, Николоски учествуваше и на Форумот на Светска банка, каде зборуваше за значењето на Коридорите 10 и 8 за поврзување на регионот со поширокиот европски простор.