Адвокатката Катерина Јовановска, како претставник на правниот тим на партијата Левица, оствари средба со Радивоје Грујич – правен аналитичар во ОБСЕ-ОДИХР, информираат од партијата.

На средбата, како што стои во соопштението, било дискутирано за правните механизми кои Левица досега ги превзела во врска со контроверзното Упатство за радиодифузерите за локалните избори 2025 година, донесено од ААВМУ. Според Левица, со тоа упатство партијата е директно оштетена, бидејќи ѝ е забрането политички да се рекламира на медиумите во текот на целата кампања.

Разговорите опфатиле и идни правни чекори што Левица планира да ги преземе за заштита на уставното право на политичко организирање и дејствување. Средбата била оценета како конструктивна, а двете страни изразиле подготвеност за понатамошна соработка, со цел навремено информирање за исходот на судските постапки во Македонија, како и евентуалните постапки пред Европскиот суд за човекови права во Стразбур.