Иран тврди дека последното видео на израелскиот премиер Бенјамин Нетанјаху, објавено со цел да ги отфрли шпекулациите за неговата судбина по иранските ракетни напади, е направено со вештачка интелигенција.

Израел го објави видеото за да ги смири гласините дека Нетанјаху е повреден или загинат. На снимката, премиерот нарачува кафе во кафуле и вели дека е „мртов… за кафе”, користејќи хебрејски израз за силна желба. Додаде и дека „го сака својот народ до смрт”, изразувајќи гордост за однесувањето на граѓаните во тековната ситуација.

Иранската новинска агенција Таснин укажува на јасни знаци дека видеото е генерирано со вештачка интелигенција. Еден од индикаторите е тоа што шолјата со кафе изгледа постојано полна без да се истура при движење, а нивото на течноста воопшто не се намалува додека Нетанјаху пие.

Покрај тоа, агенцијата забележува несовпаѓања во изгледот на лицето на Нетанјаху, особено при профилни прикази, кои се разликуваат од автентичните фотографии при споредба.

Видеото беше наменето да го увери израелското население да продолжи со секојдневните активности со соодветно внимание среде регионалните тензии.