Регулаторната комисија за енергетика (РКЕ) информира дека во периодот од 13 до 17 октомври годинава се очекува прекин во испораката на природен гас кон потрошувачите во земјава. Причина за ова се ремонтните активности на регионалните транспортни системи за пренос на природен гас, како и на гасоводот „Турски тек“.

„Сигурноста во снабдувањето е примарен интерес. Законската регулатива овозможува во услови на прекин на испорака операторот со природен гас – НОМАГАС да изврши навремено полнење на цевката и количината да ја распредели соодветно во критичните денови за корисниците кои се греат на топлинска енергија,“ соопштија од РКЕ.

Од Комисијата потсетуваат дека грејната сезона може да започне и пред 15 октомври, односно уште од 1 октомври, доколку прогнозата за температурата за следниот ден е еднаква или пониска од 12 степени Целзиусови.

Со оглед на најавениот студен и влажен бран, се очекува радијаторите на скопјани да се стоплат веќе во петок.