Соединетите Американски Држави испратија опрема за борба против дронови во Данска поради претстојните европски самити што ќе се одржат на 1 и 2 октомври во Копенхаген, соопшти денеска данското Министерство за одбрана. Со тоа САД се приклучија на бројните европски земји кои понудија поддршка откако во последните недели беа забележани дронови над територијата на земјата.

„Задоволни сме и благодарни што и САД ја поддржуваат Данска со капацитети за борба против дронови во контекст на претстојниот самит,“ се наведува во соопштението на Министерството.

Појавата на дронови предизвика затворање на неколку аеродроми, меѓу кои и оној во Копенхаген – најголемиот во северна Европа. Дронови биле забележани и над воени објекти, но од 27 септември нема нови пријавени случаи.

Главниот град на Данска утре и задутре ќе биде домаќин на два европски самити, на кои ќе учествуваат повеќе од 40 шефови на влади. За да се гарантира безбедноста на настаните, властите во неделата го затворија воздушниот простор за сите цивилни дронови до петок.

Иако полицијата сè уште не ги идентификувала сторителите на упадите, премиерката Мете Фредериксен изјави дека „само една земја претставува закана за безбедноста на Европа – а тоа е Русија“.

Стравувајќи од можни саботажи и хибридни напади, Данска денеска го подигна нивото на безбедност за енергетската инфраструктура на портокалово, што претставува второ највисоко ниво на тревога.