Турскиот министер за надворешни работи Хакан Фидан соопшти дека арапските држави од Персискиот Залив и упатиле последно предупредување на Иран, заканувајќи се со одговор доколку продолжат нападите врз нивните територии.

Фидан оваа недела посети повеќе земји од регионот и во четвртокот учествуваше на средба на министрите за надворешни работи од 11 држави, вклучувајќи ги Саудиска Арабија, Обединетите Арапски Емирати, Катар, Бахреин, Кувајт и Јордан.

Според турски медиуми, земјите од Заливот кои се под интензивни бомбардирања бараат објаснување зошто Иран ги напаѓа нивните територии додека тврди дека не е вклучен во конфликтот.

„Земјите од Заливот се под тешки удари и прашуваат зошто Иран ги напаѓа. Тие тврдат дека немаат врска со оваа војна и сметаат дека нападите се неоправдани”, објасни Фидан, нагласувајќи дека овие нации претходно појасниле дека нивниот воздушен простор нема да биде користен за ирански операции.

На средбата во Ријад, арапските држави заземаа цврст став, предупредувајќи го Техеран за можни конкретни мерки доколку нападите продолжат. „Доколку моменталната ситуација со ударите продолжи, земјите од Заливот може да бидат принудени да одговорат. На средбата во Ријад и упатија последно предупредување”, нагласи турскиот дипломат.

Фидан предупреди дека безбедносните ризици во регионот рапидно ескалираат и изрази противење на Турција кон продолжен конфликт на Блискиот Исток, посочувајќи ги тековните дипломатски напори за деескалација.

САД и Израел започнаа напади врз ирански цели на 28 февруари, предизвикувајќи штети и цивилни жртви. Иран возврати со удари врз израелска територија и американски воени инсталации ширум Блискиот Исток.