Командантот на американскиот ЦЕНТКОМ, адмирал Бред Купер, изјави дека Иран „дејствува од очај” гаѓајќи цивилни цели во конфликтот.

Во интервју за иранската сателитска мрежа Иран Интернешнал, адмиралот соопшти: „Тие дејствуваат од очај. Во изминатите неколку недели, намерно напаѓаа цивилни цели повеќе од 300 пати”.

Купер нагласи дека иранските удари кон регионалните цели се намалиле како што конфликтот влезе во четвртата недела. „На почетокот гледавте големи количини, десетици дронови и ракети. Тоа повеќе не постои”, изјави тој.

Според него, американската кампања против Иран е „пред или според распоредот”. САД и Израел ги гаѓаат производствените капацитети за ракети и дронови. „Ги елиминираме идните закани – и дроновите и ракетите, како и поморските капацитети”, нагласи тој.

Купер порача дека сè уште не е време иранските цивили да излегуваат надвор: „Ракетите и дроновите се лансираат од населените места, затоа засега мора да останете внатре. Во еден момент ќе добиете јасен сигнал дека можете да излезете”.

Тој посочи на контрастот меѓу иранското воено раководство и обичните војници: „Генералите се во длабоки бункери во и околу Техеран. Војниците на терен немаат заштита. Генералите се заштитени. Војниците не.“