Претседателот на СДСМ, Венко Филипче, изјави дека со актуелните поскапувања, дури ни минималната плата од 600 евра не е доволна за граѓаните да ја надминат економската криза. Тој посочи дека ранливите категории – ниско платените работници, пензионерите и многучлените семејства – се најпогодени.

„Граѓаните сакаат да видат дека владата се грижи за нив, чекаат мерки, а не изговори”, рече Филипче во телевизиско гостување. Тој потсети дека кога СДСМ ја предложи минималната плата од 600 евра, точно навеле од кои буџетски ставки треба да се скратат средства за да се финансира.

Филипче ја критикуваше актуелната влада дека ги минира демократските столбови на државата, наведувајќи дека институциите како Антикорупциската комисија се ослабени, а клучните позиции пополнети со владини кадри.

Лидерот на СДСМ аргументираше дека членството во ЕУ нуди пристап до околу 40 милијарди евра неповратни средства за инфраструктура и реформи, повикувајќи се на примерите на Бугарија и Хрватска кои добиле слична поддршка.