Министерот за здравство, Азир Алиу, најави дека се потребни нови протоколи и законски измени во областа на кардиохирургијата, со цел да се утврди кои пациенти навистина имаат потреба од одредени кардио-васкуларни интервенции.

Оваа иницијатива доаѓа по новите претставки поднесени до Фондот за здравствено осигурување (ФЗО) за сомнителни случаи поврзани со кардиолошки интервенции.

„Со прецизни протоколи и законски измени ќе може да се намалат можните злоупотреби во овој дел од здравствениот систем,“ истакна Алиу.

До Министерството за здравство досега пристигнале вкупно 13 претставки од пациенти кои имале извршени кардиоваскуларни интервенции во приватни клиники. Засега, во целиот процес сè уште не се вклучени странски експерти.