Првите октомвриски денови годинава донесоа и прв снег во земјава. Мала снежна покривка е забележана на повисоките планински места – Попова Шапка, превојот Стража, Маврово и Галичник.

Ладното време, според синоптичарите, ќе продолжи и утре, но веќе од сабота се очекува пораст на температурите. Метеоролозите предвидуваат дека есенските температури во ноември ќе бидат за нијанса повисоки, а зимата ќе биде поблага за еден до два степени во однос на минатата година.

Со падот на температурите започна и грејната сезона. Иако поголем дел од домаќинствата имаат обезбедено топлинска енергија, дел од нив останаа со ладни радијатори.

Од АД ЕСМ соопштија дека се работи за технички проблеми или за неплатени сметки за електрична енергија. Компанијата информира дека нивните екипи се на терен и работат на што побрзо нормализирање на снабдувањето.

Енергетските експерти посочуваат дека парното греење и инвертер уредите се најекономични системи за загревање, а притоа не ја загадуваат животната средина.

Во тек е и јавниот повик за субвенции за инвертер клими наменети за ранливите категории и семејствата со ниски примања. Рокот за аплицирање е до 5 октомври.

Според податоците на Министерството за енергетика, до средината на септември за оваа мерка аплицирале околу 4.000 граѓани.