Русија и Украина денеска реализираа нова размена на заробеници според формулата „185 за 185“. Во рамки на договорот, освен воени лица, беа ослободени и 20 цивили.

Според соопштението на руското Министерство за одбрана, од територија под контрола на Украина се вратени 185 руски војници и 20 цивили. Истовремено, Русија предаде 185 украински заробени војници на властите во Киев.

„Во согласност со руско-украинските договори постигнати на 23 јули во Истанбул, беше реализирана размена на заробеници во сооднос 185 за 185, како и враќање на 20 цивили,“ се наведува во соопштението.

Ослободените руски војници и цивили моментално се наоѓаат на територијата на Белорусија, каде што им е обезбедена психолошка и медицинска помош. Според најавите, тие ќе бидат транспортирани во Русија, каде ќе продолжат со лекување и рехабилитација во специјализирани медицински установи.