Израелските војници ја пресретнаа меѓународната флотила која се обидуваше да достави храна и лекови за цивилите во Појасот Газа. Флотилата се состоеше од повеќе од 40 цивилни бродови со над 500 парламентарци, адвокати и активисти. Целта беше да се пробие израелската блокада и да се внесе хуманитарна помош.

Израелската морнарица започнала со операција за пресретнување на бродовите на околу 90 наутички милји од Газа. Според официјалните информации, најголем дел од бродовите се веќе запрени, а само еден продолжил кон палестинските територии. Израелската влада овој потег го оцени како „провокација“ и соопшти дека сите патници, меѓу кои и активистката Грета, се безбедни.

Исчезна хрватскиот брод „Ширин“

Меѓу пресретнатите бродови бил и хрватскиот „Ширин“, со кој раководела капетанката и адвокатка Морина Милјановиќ. Овој брод бил задолжен за правна поддршка на останатите бродови во флотилата. Според последните податоци, вчера „Ширин“ го сменил курсот, а денес застанал на едно место. На официјалната интернет-страница на флотилата веќе не е прикажан, а засега нема информации дали израелските војници се качиле на него.

Израелска акција и реакција од Ердоган

Иако Израел тврди дека флотилата не успеала да ја пробие блокадата, бродот „Микено“ успеал да се доближи до палестинските територијални води пред да се изгуби контакт со него.

Претседателот на Турција, Реџеп Тајип Ердоган, остро го осуди потегот на Израел. „Оваа суровост врз цивили во меѓународни води ја открива лудоста на израелските лидери и нивните злосторства против човештвото,“ изјави Ердоган.

Европски и меѓународни реакции

Британската активистка Руи Лорен Ахтар, која била на брод што се упатил кон Кипар, објасни дека нивната екипа се вратила назад за да избегне апсење. „Ние ќе продолжиме да се бориме за ослободување на останатите членови на флотилата,“ истакна таа.

Обединетите нации изразија загриженост и ја нарекоа блокадата на Израел „незаконска“. „Израел мора да овозможи достава на храна и медицинска помош или да дозволи хуманитарните мисии да се спроведуваат без пречки,“ се наведува во соопштението од ОН. Израел ги отфрли критиките, тврдејќи дека блокадата е законска мерка за национална безбедност.