Иранската делегација пристигна во Исламабад дури откако доби гаранции дека израелските напади врз Либан ќе бидат стопирани, пренесува Wall Street Journal. Иранската страна не била подготвена да влезе во преговори без исполнување на овој услов.

Индиректните разговори меѓу американската и иранската делегација официјално започнаа, при што американскиот потпретседател Џеј Ди Венс го предводи тимот на САД, додека иранскиот парламентарен претседател Мохамед Бакер Калибаф е на чело на иранската делегација.

Американскиот претседател Доналд Трамп му се закани на Иран со „целосно уништување” доколку мировните преговори во Пакистан не дадат резултати. Истовремено, САД продолжуваат со распоредување дополнителни копнени сили на Блискиот Исток – меѓу 1.500 и 2.000 војници од елитната 82. воздушно-десантна дивизија се очекува да пристигнат во наредните денови.

„Иран има добра волја, но нема доверба во САД”, изјави Калибаф пред почетокот на разговорите, нагласувајќи дека „два пати за помалку од една година, и покрај добрата волја на Иран, не нападнаа и извршија бројни воени злосторства”.

Според американските разузнавачки проценки, Иран сè уште поседува над 1.000 балистички ракети со среден дострел, иако повеќе од половина од неговите лансирни рампи се уништени или оневозможени.

Атмосферата останува напната. Израел продолжува со удари врз Либан, а Хезболах возвраќа кон израелска територија. Додека дипломатските канали се отвораат, Вашингтон одржува воен притисок преку распоредување трупи и ретрорика, создавајќи „длабока недоверба” пред секаков потенцијален дијалог.

Иран е без глобален интернет пристап повеќе од 1.000 часа од почетокот на февруари, што дополнително ја отежнува комуникацијата и информирањето на јавноста.