Delegacioni iranian mbërriti në Islamabad vetëm pasi mori garanci se sulmet izraelite ndaj Libanit do të ndaleshin, raporton Wall Street Journal. Pala iraniane nuk ishte e gatshme të hynte në negociata pa përmbushjen e këtij kushti.

Bisedimet indirekte midis delegacionit amerikan dhe atij iranian kanë filluar zyrtarisht, ku Nënpresidenti amerikan JD Vance udhëheq ekipin e SHBA-së, ndërsa kryetari i parlamentit iranian Mohamed Baqer Qalibaf drejton delegacionin iranian.

Presidenti amerikan Donald Trump i kërcënoi Iranit me „shkatërrim të plotë" nëse bisedimet e paqes në Pakistan nuk japin rezultate. Njëkohësisht, SHBA vazhdon me vendosjen e forcave tokësore shtesë në Lindjen e Mesme — midis 1.500 dhe 2.000 ushtarë nga Divizioni elitar i 82-të Ajror pritet të mbërrijnë në ditët e ardhshme.

„Irani ka vullnet të mirë, por nuk ka besim tek SHBA-ja", deklaroi Qalibaf para fillimit të bisedimeve, duke theksuar se „dy herë në më pak se një vit, pavarësisht vullnetit të mirë të Iranit, na sulmuan dhe kryen krime të shumta lufte".

Sipas vlerësimeve të inteligjencës amerikane, Irani ende posedon mbi 1.000 raketa balistike me rreze të mesme veprimi, megjithëse më shumë se gjysma e rampave të lëshimit janë shkatërruar ose çaktivizuar.

Atmosfera mbetet e tensionuar. Izraeli vazhdon sulmet ndaj Libanit, ndërsa Hezbollahu hakmerret drejt territorit izraelit. Ndërsa kanalet diplomatike po hapen, Uashingtoni ruan presionin ushtarak përmes vendosjes së trupave dhe retorikës, duke krijuar „mosbesim të thellë" para çdo dialogu të mundshëm.

Irani ka mbetur pa qasje në internetin global për mbi 1.000 orë që nga fillimi i shkurtit, gjë që e vështirëson edhe më shumë komunikimin dhe informimin e publikut.