Пожар во станбено-комерцијалниот комплекс „Арлис” во Тирана повреди најмалку 11 лица, меѓу кои и пожарникари. Една жена е хоспитализирана со изгореници, а пет лица се примени во Клиниката за токсикологија поради вдишување чад.

Огнот го зафати североисточниот дел на зградата од приземјето до горните катови. Повеќе од 50 пожарникари од Тирана и други градови, заедно со воен персонал, учествуваа во гаснењето. Хеликоптери беа вклучени во евакуацијата на станарите.

Директорот на албанските итни служби Арбен Кара изјави дека пожарот е ставен под контрола за да се спречи ширење, но интервенцијата продолжувала поради жаришта во становите. Точниот број на настраданите и вкупната материјална штета сè уште се утврдуваат.