Новиот француски премиер Себастијан Лекорну поднесе оставка само неколку часа по именувањето на својот кабинет, откако сојузници и противници се заканија дека ќе ја соборат владата.

Оставката, која француските медиуми ја опишуваат како неочекувана и без преседан, претставува уште едно продлабочување на политичката криза во земјата. Веста веднаш предизвика пад на француските акции и слабеење на еврото.

Лекорну, близок сојузник на претседателот Емануел Макрон, го именуваше својот кабинет само вчера, по неколку неделни консултации со политичките партии. Првиот состанок на владата требаше да се одржи денес попладне.

„Г-дин Себастијан Лекорну ја поднесе својата оставка до претседателот на Републиката, кој ја прифати“, соопштија од Елисејската палата.

Кабинетот на Лекорну предизвика незадоволство и кај опозицијата и кај дел од сојузниците, отворајќи прашања за стабилноста на извршната власт во услови на фрагментиран парламент и отсуство на јасно мнозинство.

Француската политика е сè понестабилна од реизборот на Макрон во 2022 година. Одлуката за предвремени парламентарни избори минатата година создаде уште поделен парламент, а Лекорну беше петтиот премиер на Макрон во последните две години.