Словачкиот премиер Роберт Фицо сака да оди во Москва на 9 мај – Денот на победата. Литванија и Латвија му забранија да лета над нивна територија. „Зошто? Земји-членки на ЕУ не дозволуваат премиер на друга земја-членка да лета над нивниот воздушен простор”, праша Фицо, очигледно изненаден дека некој во Европа му поставува граници.

Ова не е прв пат. Лани Естонија го блокираше. Фицо вели дека ќе најде друг пат – и сигурно ќе го најде. Прашањето не е дали ќе стигне во Москва, туку какво е тоа ЕУ во кое еден премиер систематски го крши консензусот на Унијата, а единствениот одговор е забрана за прелет.

Фицо и неодамна поразениот Виктор Орбан се сметаат за најблиските сојузници на Русија во ЕУ. Орбан загуби од Петер Маѓар на изборите на 12 април. Словачка и Унгарија повеќепати се спротивставуваа на напорите на ЕУ за дополнителна поддршка на Киев.

Словачкиот министер за надворешни работи Јурај Бланар најави дека Словачка ќе стави вето на 20-тиот пакет санкции против Русија – освен ако Братислава не добие гаранции за нафтоводот „Дружба”, преку кој руска нафта стигнува во Словачка преку Украина.

Значи: Фицо сака на парада во Москва, го блокираат три балтички земји, а истовремено условува цела Европа со вето на санкции. Балканот го гледа ова и се прашува – дали ЕУ е заедница на вредности или клуб каде секој игра за себе?