Во Холандија повторно е регистрирано жариште на птичји грип, за првпат по март годинава. Вирусот е потврден на фарма за гоење кокошки во покраината Дренте, каде што ќе бидат еутанизирани околу 71.000 птици со цел да се спречи ширењето на заразата.

„Иако сме свесни дека ризикот од појава на птичји грип се зголемува со доаѓањето на есента, секој нов случај е разочарувачки. Се надевав дека ова ќе се случи подоцна во сезоната“, изјави Кес де Јонг, претседател на Здружението за одгледување живина, за холандскиот јавен радиодифузен сервис NOS.

Во радиус од три километри околу погодената фарма се наоѓаат уште шест фарми, кои ќе бидат ставени под посебен надзор.
Дополнително, е воведена забрана за транспорт на живина, јајца, ѓубриво и отпад за 25 фарми во радиус од десет километри.

Холандската Агенција за безбедност на храната (NVWA) спроведува истрага и кај други фарми кои можеби имале контакт со заразената локација.

Птичјиот грип може да предизвика сериозни здравствени проблеми кај птиците – како потешкотии при дишењето, воспаление на очите и слабост – а најтешките форми можат да бидат и фатални.
Пренесувањето на вирусот на луѓето е многу ретко, и обично се случува само при близок контакт со заразени животни, па затоа не претставува значителна закана за населението.

Поради зачестените епидемии на птичји грип, вакцина против вирусот е во експериментална фаза уште од 2023 година.