Премиерот Мицкоски од Виена им порача на Македонците во Австрија: вратете се, инвестирајте, движете ја државата напред. „Работиме посветено да создадеме стабилна и предвидлива бизнис-клима” – рече пред дијаспората, со владината делегација зад себе и со вицепремиерот Николоски кој ја опиша дијаспората како „клучен партнер за инвестиции и економски раст”.

Пораката не е нова. Секоја влада од независноста наваму ги повикува иселениците да се вратат. Разликата е во тоа што ветувале и што испорачале. Дијаспората во Австрија – една од најголемите македонски заедници во Европа – одамна слуша такви зборови. Тие што се вратиле знаат колку „стабилна бизнис-клима” значи во пракса.

Мицкоски истакна дека средбите со дијаспората се важни за градење доверба и заедница. „Вие сте додадена вредност на нашето општество” – рече, убеден дека само заедно можат да ја движат државата напред.

Во фокусот на посетата беше и продлабочување на билатералната соработка со Австрија, особено во контекст на европската регионална агенда. Дали зад зборовите ќе следат конкретни олеснувања за оние што навистина сакаат да инвестираат – тоа дијаспората ќе го оцени со нозете, не со аплаузите.