Во експлозијата во стан на улица Косовска животот го загуби 21-годишниот Мартин С. од Македонија

Во експлозијата што се случи во стан на улица Косовска во Белград, загина македонскиот државјанин Мартин С. (21). Според неофицијални информации, младиот човек немал криминално досие и во Македонија бил познат како манекен.

Идентитетот на жртвата е потврден, а српскиот портал „Курир“ објави дека експлозијата била предизвикана од експлозивна направа која, според сомнежите, била подготвена за ликвидација на лице со криминално минато и врски со навивачки групи.

Според истрагата на Вишото јавно обвинителство во Белград, е уапсен Филип В. од Белград, за кого постои сомневање дека му ја предал бомбата на младиот Македонец еден ден пред несреќата.

Настанот се случил на 1 октомври, во стан изнајмен на дневна основа, кога Мартин С. наводно случајно го активирал уредот кој требало да се употреби за ликвидација.

Од местото на несреќата, каде што експлозијата ги срушила ѕидовите и ги искршила прозорците, полицијата пронашла шифрирани мобилни телефони.

„Сè уште се работи на целосно дешифрирање на содржината од телефоните. Првичните анализи покажуваат дека во пораките се споменува прекар кој се појавил во неколку претходни ликвидации, меѓу кои и убиството на Никола Станковиќ – Пивце. Оперативните податоци укажуваат дека групата поврзана со овој случај има врски со таканаречената ‘вештерска група’ и со кавачкиот клан“, изјавил извор за „Курир“.

Да потсетиме, Никола Станковиќ – Пивце беше убиен во декември минатата година, додека спиел во својот дом. Напаѓачите упаднале во куќата и го застрелале додека спиел во кревет со својата бремена свршеница.