Сателитска снимка од европскиот Sentinel-2 потврди она што многумина го претпоставуваа: најмалку 33 брзи воени чамци на Иранската Револуционерна гарда се формирани северно од Хормушкиот Теснец, близу иранскиот брег кај Карган.

Ова не е рутинска вежба. Истиот ден, иранските вооружени глисери пукаа и запленија два контејнерски брода – „MSC Франческа” и „Епаминондас” – додека трет брод, „Еуфорија”, претрпе оштетувања. Хормуз, теснецот низ кој тече 20% од светската нафта, е на работ на целосно затворање.

Флотата „комарци”

Тајната на иранската поморска стратегија се лесни глисери со посада од 3-5 луѓе, брзина до 110 км/ч и плиток газ кој им дозволува да се кријат по бреговите и островите. Вооружени со тешки митралези, неводени ракети, а некои носат и краткодометни противбродски проектили. Иран располага со над 1.000 такви пловила, многу скриени во подземни тунели и островски бази.

Овие чамци не водат конвенционална морнаричка војна. Нивната работа е хаос: зголемување на осигурителните трошоци, ширење страв, принуда за менување рути. Минимален трошок, максимален притисок. Тактиката датира од Танкерската војна во 80-тите, но денес е далеку понапредна и децентрализирана.

За НАТО и западните морнарици, неутрализирање на ваква закана бара постојана воздушна поддршка, радарски надзор и единици за брз одговор. Бројките и теренот се на страната на Иран. А Хормуз е тесен – и тоа е единствената работа што Техеран му треба.