Украински дрон удри во рафинеријата во Туапсе на 20 април. Четири дена подоцна, пожарот сè уште не е изгаснат. Димот се крева трет ден по ред. Жителите на градот – 61.500 луѓе на брегот на Црното Море, 75 километри од Сочи – живеат во еколошка катастрофа.

„Ова е вистинска еколошка катастрофа. Што да правам? Не сакам повеќе да бидам тука. Морам да заминам денес”, изјавила една жителка додека се обидувала да ги исчисти црните остатоци што го покриваат градот. Друга жителка порачала дека нејзината доверба во руското раководство „целосно се срушила”.

„Нова Хирошима” – без радијација

Пророски медиуми ја споредуваат ситуацијата со историски нуклеарни катастрофи. „Она што се случува во Туапсе е како Хирошима, само без радијација”, стои на еден Телеграм канал. Павел Кухмиров тврди дека градот „повеќе не постои” – загадена земја, вода и воздух.

Локалните власти чекаа три дена пред да објават дека квалитетот на воздухот е сериозно нарушен. Центарот за итни случаи потврди дека продуктите од согорување влегле во атмосферата и паднале со дождот на 22 април. Концентрацијата на бензен, ксилен и саѓи е два до три пати над нормалата во неколку населби.

Рафинеријата во Туапсе, оперирана од Росњефт, е меѓу десетте најголеми во Русија и преработува околу 12 милиони тони сурова нафта годишно. Кога горат вакви капацитети, последиците не остануваат локални. Димот се шири, нафтата поскапува, а луѓето кои живеат до рафинеријата дознаваат последни дека воздухот е отровен.