Njëzet e dy shtete - mes tyre edhe Maqedonia - i dërguan një paralajmërim të përbashkët Iranit. Akuza është e rëndë: se Teherani drejton një fushatë në të cilën angazhon banda kriminale ndërkombëtare dhe vendore për të kryer vrasje dhe sulme terroriste në tokë të huaj, në mbarë Evropën, Amerikën e Veriut dhe Australinë.

Lista e nënshkruesve flet vetë - Shqipëria, Australia, Belgjika, Britania, Bullgaria, Kanadaja, Çekia, Danimarka, Estonia, Franca, Finlanda, Gjermania, Irlanda, Letonia, Lituania, Holanda, Zelanda e Re, Maqedonia, Norvegjia, Portugalia, Suedia dhe SHBA. Kur kaq shumë vende të ndryshme nënshkruajnë të njëjtën deklaratë, kjo zakonisht do të thotë se pas saj qëndron diçka më serioze se mirësjellja diplomatike.

Objektivat, sipas paralajmërimit, nuk janë të rastësishme. Në shenjë janë komunitetet hebraike në Britani, Belgjikë dhe Holandë, si dhe gazetarët opozitarë iranianë e amerikanë në mërgim. Grupi radikal HAYI mori përgjegjësinë për sulme me thikë ndaj hebrenjve dhe për zjarrvënie në sinagoga në veri të Londrës. Australia shkoi më larg - dëboi ambasadorin iranian dhe mbylli ambasadën e vet në Teheran, pasi e akuzoi zyrtarisht Iranin se kishte porositur sulme antisemite, përfshirë një zjarr në një sinagogë në Melburn dhe në një kafene koshere në Sidnej.

„Përpjekjet për vrasje, rrëmbim, ngacmim, frikësim apo çfarëdo sulme tjera ndaj njerëzve në tokën tonë e dëmtojnë drejtpërdrejt sovranitetin kombëtar dhe normat ndërkombëtare. Këto veprime duhet të ndalen menjëherë“, thuhet në komunikatën e përbashkët.

Pse kjo është e rëndësishme pikërisht për ne? Sepse Maqedonia nuk është vëzhguese anësore - është në listën e nënshkruesve. Kjo do të thotë se edhe shteti ynë, të paktën në letër, numërohet mes atyre që i thanë Teheranit se nuk do t'i mbyllin sytë. Pyetja që mbetet është nëse pas nënshkrimit qëndron edhe kapaciteti për ta njohur një kërcënim të tillë nëse ndonjëherë vjen më afër - sepse „toka e huaj“ në një botë të globalizuar është më e shtrirë se kurrë.