Дваесет и две држави – меѓу нив и Македонија – испратија заедничко предупредување до Иран. Обвинението е тешко: дека Техеран организира кампања во која ангажира меѓународни и локални криминални банди за да извршува убиства и терористички напади на туѓо тло, низ Европа, Северна Америка и Австралија.

Списокот на потписнички зборува сам за себе – Албанија, Австралија, Белгија, Британија, Бугарија, Канада, Чешка, Данска, Естонија, Франција, Финска, Германија, Ирска, Латвија, Литванија, Холандија, Нов Зеланд, Македонија, Норвешка, Португалија, Шведска и САД. Кога толку различни земји потпишуваат иста изјава, тоа обично значи дека зад неа стои нешто посериозно од дипломатска љубезност.

Метите, според предупредувањето, не се случајни. На удар се еврејските заедници во Британија, Белгија и Холандија, како и ирански и американски опозициски новинари во егзил. Радикалната група HAYI презеде одговорност за напади со нож врз Евреи и за подметнати пожари во синагоги во северен Лондон. Австралија отиде најдалеку – го протера иранскиот амбасадор и ја затвори својата амбасада во Техеран, откако официјално го обвини Иран дека нарачал антисемитски напади, вклучително пожар во синагога во Мелбурн и во кошер-кафуле во Сиднеј.

„Обидите за убиства, грабнувања, малтретирање, заплашување или какви било други напади врз луѓе на наше тло директно го поткопуваат националниот суверенитет и меѓународните норми. Овие акции мора веднаш да престанат”, се вели во заедничкото соопштение.

Зошто ова е важно токму за нас? Затоа што Македонија не е странична набљудувачка – таа е на списокот на потписнички. Тоа значи дека и нашата држава, барем на хартија, се вброи меѓу оние што му порачаа на Техеран дека нема да затвораат очи. Прашањето што останува е дали зад потписот стои и капацитет да се препознае ваква закана ако некогаш стигне поблиску – бидејќи „на туѓо тло” во глобализиран свет е порастегливо од кога било.