Oborri i sheikut Muhamed bin Rashid Al Maktum, nënpresident dhe kryeministër i Emirateve të Bashkuara Arabe dhe sundimtar i Dubait, njoftoi se sot në mëngjes ndërroi jetë sheiku Ahmed bin Rashid Al Maktum. Në Dubai është shpallur zi zyrtare dhjetëditore që fillon të hënën, ndërsa flamujt në territorin e emiratit do të ulen në gjysmë shtize.

Oborri shprehu ngushëllime për familjen dhe të afërmit e të ndjerit. Detaje zyrtare për shkakun dhe rrethanat e vdekjes për momentin nuk janë njoftuar.

Ahmed bin Rashid Al Maktum ka lindur më 12 korrik 1950 në Bur Dubai, si djali i katërt dhe më i vogël i ish-sundimtarit të Dubait, sheikut Rashid bin Said Al Maktum, i cili sundoi nga viti 1958 deri në 1990. Ishte vëllai më i vogël i sundimtarit aktual të Dubait dhe kryeministrit të Emirateve.

Para se të bëhej sheik, ushtroi funksionin e zëvendësshefit të policisë dhe sigurisë publike të Dubait. Kishte rol të rëndësishëm edhe në zhvillimin e garave hipike në emirat, përfshirë hipodromin Xhebel Ali, dhe kontribuoi në themelimin e Dubai International Marine Club. Në botën e biznesit ishte kryetar i A.R.M. Holding dhe i Dubai Real Estate Centre. Ndryshe nga babai dhe vëllai, kurrë nuk u ul në fron.

Dhjetë ditë zie për një njeri që nuk sundoi thotë diçka për mënyrën si funksionon pushteti në Emirate. Atje trashëgohet mbiemri, jo vetëm funksioni - dhe pozita e familjes matet përmes asaj që mban, jo vetëm përmes asaj se kush është në krye.