Çmimet „Princeshë e Asturias” janë një nga çmimet më prestigjioze spanjolle - ndërsa mbreti Felipe VI, mbretëresha Letisia dhe princesha Leonor ulen në rreshtin e parë të teatrit „Kampoamor” në Oviedo, bota shikon. Dhe aty ku ka prestigj dhe prekje me kurorën, shfaqen edhe ata që dinë ta shesin atë prekje. Edhe kur ajo prekje nuk ekziston.

Organizatorët e çmimeve zbuluan një mashtrim të përgatitur me një saktësi të pakëndshme. Dikush paraqitej si Oborri Mbretëror dhe u shkruante mysafirëve të mëparshëm përmes WhatsApp, me mesazhe që gjoja vinin nga Kamilo Vilarino, shefi i kabinetit të mbretit. Mesazhi ishte i shkurtër dhe lajkatar: Felipe VI dëshiron të vijë në kontakt me ju.

Pastaj pasuan mejle me dokumente të rreme PDF, të rregulluara deri në detajin e fundit - ngjyra blu zyrtare e Fondacionit, logoja, grafika. Kushdo që i shihte do të besonte se mban një dokument të vërtetë institucional. Dhe dokumenti ofronte „mikpritje dhe sponsorizim” në katër nivele, me çmime që thonë gjithçka për kë ishte menduar mashtrimi.

Paketa më e shtrenjtë, e quajtur „Platinum”, kushtonte 1,8 milionë euro - për ulëse me „shquarsi maksimale”. „Gold” shkonte për 1,4 milionë, e menduar për subjekte me „kapacitet të lartë relacional”. „Silver” shitej për 920.000 euro. Dhe më e larta, „Tryeza Mbretërore”, nuk kishte çmim fiks - vetëm premtimin për afërsi me familjen mbretërore dhe një pritje private. Kur nuk ka çmim, do të thotë se çmimin e përcakton lakmia e blerësit.

Pagesat shkonin përmes telefonave me parapagesë që nuk gjurmohen. Fondacioni u detyrua të shpjegonte publikisht se kurrë nuk kërkon para për organizimin e ceremonisë dhe se financohet vetëm nga mbështetës dhe subvencione. U detyrua të mbrohej nga diçka që fare nuk e kishte bërë.

Këtu është mësimi që vlen më shumë se cilado nga ato paketa. Mashtrimi nuk funksionon sepse njerëzit janë budallenj - funksionon sepse statusi shitet, dhe ata që duan të blejnë afërsi me pushtetin janë gati të mos bëjnë pyetje. Sa njerëz të pasur klikuan në atë mejl para se dikush të ngrinte telefonin dhe të verifikonte? Kjo është shifra që Fondacioni nuk do ta publikojë.