Irani publikoi një „listë të zezë“ me emrat e liderëve perëndimorë të shënuar si përgjegjës për vdekjen e udhëheqësit të tij suprem - dhe mes tyre është edhe kryeministrja italiane Xhorxha Meloni. Shërbimet e inteligjencës italiane hapën menjëherë një hetim për kërcënimet.

Lista, e publikuar në një gazetë të lidhur me administratën e qytetit të Teheranit, është e gjatë dhe e rëndë. Nga ana amerikane përfshin Donald Trumpin, sekretarin e shtetit Marko Rubio dhe ministrin e mbrojtjes. Nga ana izraelite - kryeministrin Benjamin Netanjahu dhe krerët e komandës ushtarake. Ndërsa nga Evropa - kancelarin gjerman Fridrih Merc, presidentin francez Emanuel Makron dhe kryeministrin britanik Kir Starmer.

Arsyeja është një: të gjithë ata janë shpallur „përgjegjës për vrasjen e Ali Hameneit“, udhëheqësit suprem iranian që humbi jetën në një sulm amerikano-izraelit në fillim të luftës. Udhëheqësi i ri suprem, Moxhtaba Hamenei, premtoi hakmarrje me një formulim ogurzi: „Së shpejti njerëz të lirë anembanë botës do të kryejnë pjesën e tyre të kësaj misioni hyjnor.“

Pikërisht kjo fjali është ajo që shqetëson shërbimet perëndimore - sepse nuk thërret një shtet, por „njerëz të lirë anembanë botës“, çka në përkthim në gjuhën e inteligjencës do të thotë individë, sulmues të vetëm. Italia tani po verifikon nëse gazeta përfaqëson politikën zyrtare të regjimit apo vetëm zërin e krahut të ashpër në Teheran.

Roma tani për tani nuk dëshiron t'i ndërpresë kanalet diplomatike me Iranin, të cilat i konsideron „të forta dhe të sigurta“, por nuk përjashton thirrjen e ambasadorit iranian në bisedë. Për Evropën, kjo është kujtesë se lufta në Lindjen e Mesme nuk mbetet atje - ajo udhëton, në formë kërcënimesh, frike dhe kostosh sigurie, drejt e në zemër të kontinentit.