Familja mbretërore norvegjeze hyn në fazë kritike. Princesha Mete-Marit, mbretëresha e ardhshme, po keqësohet - dhe bashkëshorti i saj, princi i kurorës Hokon, e konfirmoi këtë publikisht gjatë ndarjes së çmimit Abel. "Është rëndë e sëmurë, dhe besoj se është keqësuar së fundi. Jam i shqetësuar për shëndetin e saj", deklaroi Hokon, me një hapje të rrallë për oborrin norvegjez.

Mete-Marit, 52 vjeçe, është diagnostikuar me fibrozë pulmonare që nga viti 2018 - sëmundje e pashërueshme që krijon gradualisht plagë në mushkëri dhe sjell vështirësi gjithnjë e më të mëdha të frymëmarrjes. Tashmë përdor oksigjen përmes kanyle nazale çdo ditë. Është në listën e pritjes për transplant mushkërish, dhe vetë Hokon tha se "vendimi është mjekësor - mjekët vendosin kur është momenti i duhur". Përkthim: nuk është larg.

Herën e fundit u shfaq publikisht më 17 maj, festën kombëtare të Norvegjisë, në rezidencën Skaugum - me mbështetje oksigjeni, ulur në karrige. Kjo është pamja që ndryshoi tonin e gjithçkaje për publikun norvegjez, që ishte mësuar me një mbretëreshë të ardhshme energjike.

Kriza nuk vjen vetëm. Mbreti Harald dhe mbretëresha Sonja (88) kanë problemet e tyre shëndetësore - ajo u pranua urgjentisht në spital para disa ditësh. Ndërsa djali i Mete-Maritit nga lidhja e mëparshme, Marius Borg Hejbi, paraqitet në gjyq për disa akuza, gjë që i shton peshë politike dramës familjare. Kurora norvegjeze, e njohur për diskrecionin, këtë radhë nuk arrin ta fshehë peshën e momentit.