Qeveria po bën rebalancin e dytë të buxhetit këtë vit, ndërsa procedura duhet të përfundojë deri në fund të tetorit, paralajmëroi kryeministri Hristijan Mickoski. Arsyeja janë të hyrat më të ulëta nga akcizat dhe TVSH-ja, të cilat Qeveria i uli për t'i mbajtur të ulëta çmimet e karburanteve. Mungesa, sipas Mickoskit, është 7 deri 8 miliardë denarë, përkatësisht deri në rreth 130 milionë euro.

Vlerësimi rritet më shpejt se sa shpjegohet. Të mërkurën e kaluar, më 30 shtator, kryeministri fliste për 6 deri 7 miliardë denarë, ose rreth 97 deri 113 milionë euro. Për më pak se një javë shifra u rrit edhe për një miliard denarë. Rebalanci i parë u miratua në fund të korrikut.

Ku do të shkurtohet? Mickoski nuk precizoi cilët shfrytëzues buxhetorë do të marrin më pak. Tha vetëm se prioritet janë standardi i qytetarëve dhe inflacioni i ulët dhe sërish porositi se karburantet te ne janë „nga 25 deri 50 centë“ më të lira se kudo në rajon. Më 5 tetor Komisioni Rregullator i Energjisë i uli çmimet edhe një herë: naftën për tre denarë, ndërsa benzinat për një denar e gjysmë për litër.

Me rebalancin e korrikut të hyrat u projektuan në 379,5 miliardë denarë, ndërsa shpenzimet në 425,8 miliardë, me deficit prej 46,3 miliardë denarësh ose 4,1 për qind të BPV-së. Deri në mes të shtatorit, sipas të dhënave në dispozicion, deficiti i realizuar tashmë i ishte afruar shumës së planifikuar vjetore.

Opozita nuk e blen arsyetimin. Lideri i LSDM-së Venko Filipçe pohon se nëse çmimi i karburanteve është rritur për më shumë se 50 për qind, atëherë edhe me TVSH dhe akcizë më të ulët, të hyrat nga karburanti më i shtrenjtë nuk do të duhej të binin aq sa thotë Qeveria. LDP-ja, nga ana tjetër, kërkon që në vend të subvencionimit të karburantit për qytetarët e shteteve fqinje që furnizohen te ne, të futet kthimi i TVSH-së për qytetarët dhe bizneset vendase.

Karburanti më i lirë në rajon është politikë që tingëllon shkëlqyeshëm në pompë. Por kur vlerësimi i çmimit të saj rritet brenda një jave dhe askush nuk thotë nga cili zë buxhetor do të paguhet, kjo nuk është më vetëm politikë çmimesh. Kush do ta mbulojë diferencën - dhe a do ta mësojmë këtë para apo pas rebalancit?