Lideri i opozitës Peter Magyar i fitoi zgjedhjet parlamentare në Hungari me shumicë bindëse, duke i vënë fund sundimit të Viktor Orbanit që zgjati më shumë se një dekadë.

Partia Tisza e Magyarit siguroi 132 nga 199 vende parlamentare sipas rezultateve paraprake, ndërsa partia Fidesz e Orbanit fitoi vetëm 59 vende, duke kaluar në opozitë. Tisza fitoi 93 vende përmes kandidatëve të drejtpërdrejtë dhe 39 përmes listave partiake, ndërsa koalicioni Fidesz-Demokratët e Krishterë fitoi 46 vende listash dhe 13 vende të drejtpërdrejta.

Kryeministri Orban i uroi Magyarit fitoren zgjedhore përmes telefonit, konfirmoi vetë Magyar në faqen e tij në Facebook. "Kryeministri Viktor Orban na uroi për fitoren përmes telefonit", shkroi Magyar.

Partia e ekstremit të djathtë "Atdheu ynë" fitoi tetë vende parlamentare, duke plotësuar përbërjen e re parlamentare që premton ndryshime të rëndësishme në politikën e jashtme dhe të brendshme të Budapestit.

Rezultati konsiderohet një kthesë historike në politikën hungareze dhe mund të sjellë ndryshime thelbësore në marrëdhënien e vendit me Bashkimin Evropian dhe NATO-n.