Një trik aq i vjetër sa edhe frigoriferi është bërë sërish hit viral: skin icing, ose vendosja e të ftohtit në fytyrë për të zvogëluar ënjtjen, rrathët e errët dhe ndjesinë e shtrëngimit. Ideja është e thjeshtë, por pas saj qëndron fiziologji e vërtetë - jo vetëm një dëshirë e modës për diçka të re.

Kur lëkura vjen në kontakt me të ftohtin, enët e gjakut së pari shtrëngohen, e pastaj zgjerohen - çka e përmirëson rrjedhën e oksigjenit dhe lëndëve ushqyese. Klaudia Sançez, farmaciste dhe drejtoreshë ekzekutive e një kompanie kozmetike, shpjegon se i ftohti vepron kundër ënjtjes, qeskave nën sy dhe ndjesisë së fytyrës „të fryrë", sidomos në mëngjes. Rezultati duket për pak minuta, ndërsa lëkura duket më e freskët e më e zgjuar.

Por ka edhe paralajmërime të rëndësishme. Asnjëherë mos e vendosni akullin drejtpërdrejt mbi lëkurë - rrezikoni ngrirje dhe dëmtim të kapilarëve. Mbështilleni akullin në një pëlhurë pambuku ose përdorni një vegël speciale me temperaturë të kontrolluar. Mbajeni më së shumti nga një deri në pesë minuta, me lëvizje të buta lart, pa u ndalur në një vend, dhe vendosni një serum paraprakisht për mbrojtje.

Metoda nuk është për të gjithë. Njerëzit me rozace, lëkurë të ndjeshme ose reaktive, dermatit ose barrierë të dëmtuar të lëkurës duhet ta shmangin. Dhe më e rëndësishmja - mos krijoni iluzione: skin icing jep vetëm një efekt të përkohshëm kozmetik. Nuk e kthen kohën, nuk krijon kolagjen dhe nuk e ndryshon strukturën e lëkurës. Të freskon për para pasqyrës, nuk të rinon përgjithmonë. Kur industria e bukurisë shet një „mrekulli", ia vlen të dihet ku është kufiri.