Më 16 shtator, në mes të një dite pune, një burrë hyri në një ordinancë private gjinekologjike në poliklinikën „Bukuresht“ në Karposh. Fillimisht e kërcënoi doktorin Dejan Ognenoviq, e pastaj e sulmoi me disa goditje. Mjeku përfundoi me rruazë të thyer të qafës. Në ordinancë kishte edhe njerëz të tjerë - edhe ata, sipas prokurorisë, sulmuesi i frikësoi.

Një javë më vonë, Prokuroria Themelore Publike Shkup hapi procedurë hetimore për veprën penale „dhunë“ nga neni 386 i Kodit Penal. Paraburgim nuk kërkoi. Gjyqtarit të procedurës paraprake i propozoi masa kujdesi: i dyshuari të jetë i arritshëm për procedurën dhe të mos i afrohet as mjekut as ordinancës.

Ta themi gjënë me emrin e vërtetë: ky nuk është „incident“ dhe nuk është „mosmarrëveshje“. Dikush hyri në vendin e punës të dikujt tjetër dhe i theu rruazën një njeriu që po punonte. Emri i të dyshuarit nuk është publikuar, por vepra po - dhe kjo mjafton.

Kërcënimet para goditjeve

Ognenoviq para mediave deklaroi se sulmi ishte kulmi i një vargu kërcënimesh që kishte marrë më parë dhe se ka frikë për sigurinë e tij dhe të familjes. Rastin e denoncoi në polici po atë ditë. Sipas dëshmisë së tij, parashtroi kallëzim edhe në kontrollin e brendshëm të MPB-së, sepse një javë rasti nuk procesohej. Nga MPB dhanë përgjigjen që e dimë përmendsh: po ndërmerren masa për sqarim të plotë. Pyetja është çfarë ndodh me kërcënimet para se të bëhen goditje.

Oda e Mjekëve e dënoi ashpër sulmin. „Kujtojmë se sulmi ndaj punonjësit shëndetësor në vendin e punës konsiderohet sulm ndaj personit zyrtar, për të cilin është parashikuar edhe dënim me burg“, thonë prej aty. Prokuroria, të paktën për momentin, ndjek penalisht për „dhunë“. Nëse ai kualifikim do të mbetet deri në fund, do ta tregojë procedura. Oda, ndryshe, nuk ka marrë asnjë njoftim zyrtar për rastin - as nga doktori, as nga policia.

Dhuna ndaj mjekëve, thonë nga profesioni, është dukuri e shpeshtë, ndërsa pjesa më e madhe e rasteve kurrë nuk arrijnë deri te kallëzimi. Ky arriti - me një rruazë të thyer si dëshmi. Tani do të shohim nëse sistemi di ta përfundojë deri në fund të paktën një rast të tillë.