Të martën pasdite, rreth orës 17, mbi oborrin e ish-„Železarës“ në Shkup u ngrit një shtyllë tymi të dendur e të zi, që shihej nga shumë pjesë të qytetit dhe arriti deri në Novo Lisiçe. Në terren dolën 20 zjarrfikës me nëntë automjete. Sipas Qendrës për Menaxhim me Kriza, zjarri shpërtheu në një magazinë për bojëra dhe llaqe në bulevardin „Aleksandar Makedonski“ numër 67. Ekoaktivistët e „Zelen human grad“ flasin për ndërtesën administrative të „Fakom“, kompani për konstruksione çeliku që është në falimentim.

Iniciativa qytetare tani kërkon që Prokuroria Themelore Publike të hapë menjëherë hetim për ndotje të mjedisit, ndërsa Inspektorati Shtetëror i Mjedisit të kryejë mbikëqyrje të jashtëzakonshme urgjente. „Tym i madh i zi nga një ndërtesë administrative nuk duhet të ketë. Çfarë ruhej atje?“, pyesin nga iniciativa. Kërkojnë përgjigje se çfarë u dogj dhe në çfarë sasie, dhe hapur e krahasojnë tymin me atë nga djegia e mbeturinave elektronike në Trubarevë.

Bojëra dhe llaqe në një zonë industriale

Të dhëna zyrtare për magazinën e bojërave dhe llaqeve pjesërisht i përgjigjet pyetjes pse tymi ishte i zi. Por hap të tjera. Kush e përdorte magazinën? A kishte mbrojtje kundër zjarrit dhe leje për ruajtjen e materieve të tilla? A kishte qenë ndonjë inspektor atje para zjarrit - apo do të shkojë vetëm tani, pas tymit? Përgjigje për këto pyetje deri tani nuk ka.

„Kërkojmë përgjegjësi të plotë nga pronarët, si dhe përditësim dhe transparencë nga inspektoratet kompetente“, porosisin nga „Zelen human grad“, duke kujtuar nenin 43 të Kushtetutës, i cili u garanton qytetarëve të drejtën për mjedis të shëndetshëm. Aksidenti, thonë ata, nuk guxon të mbulohet pa një epilog institucional dhe penal.

Shkupi këtë verë tashmë ka thithur tym nga zjarret në pyjet e Kitkës, në Studeniçan dhe Zelenikovë, e në fillim të shtatorit edhe nga zjarri i madh që nga Kosova hyri pranë Graçanit. Këto janë zjarre që vështirë parandalohen. Një magazinë me bojëra në një zonë industriale brenda qytetit është diçka krejt tjetër - është rrezik që mund të kontrollohet paraprakisht. Pyetja është nëse e ka kontrolluar ndokush ndonjëherë.