Shteti amerikan i Tenesit të mërkurën duhej ta ekzekutonte 50-vjeçaren Christa Gail Pike. Në vend të kësaj, pas dy dozave pentobarbital - ilaçi që Tenesi e përdor për injeksione vdekjeprurëse - e dënuara mbeti gjallë dhe me automjet të ndihmës së shpejtë u dërgua nga burgu në spital. Gjendja e saj shëndetësore për momentin nuk dihet.

Gazetarët që ishin dëshmitarë përshkruajnë një skenë që vështirë harrohet. Pike ishte e lidhur për shtratin në dhomën e ekzekutimit. Në një moment e ngriti kokën dhe e pyeti personelin e burgut nëse dora duhet ta ndiejë kështu. Doza e dytë u dha deri në orën 20:26 me kohën lokale, ndërsa pas perdes së mbyllur pastaj dëgjohej si gërhiste me zë të lartë. Mikrofoni u fik në orën 20:53, ndërsa gazetarëve iu kërkua të dalin. Zyrtarët e burgut në atë moment nuk mundën të shpjegonin çfarë ndodhi.

Sipas Death Penalty Information Center, organizatë amerikane që e ndjek dënimin me vdekje, deri tani ka pasur raste kur ekzekutimi nuk ka mundur të kryhet për shkak të problemeve me gjetjen e venës. Por nuk dihet asnjë rast i mëparshëm që një i dënuar të ketë mbetur gjallë pasi i janë dhënë tashmë ilaçet e ekzekutimit.

Dhe kjo nuk është hera e parë këtë vit. Në maj Tenesi hoqi dorë nga ekzekutimi i Tony Carruthers, pasi ekzekutuesit për më shumë se një orë nuk arritën të vendosnin linjë intravenoze. Shteti që kërkon të drejtën të marrë jetë këtë vit dy herë tregoi se nuk e zotëron as procedurën e vet. Nëse sistemi nuk di të vendosë një gjilpërë, sa i sigurt është në gjithçka tjetër që bën rrugës deri në atë dhomë?

Krimi

Pike ishte 18 vjeçe kur, në janar të vitit 1995 në Knoxville, bashkë me të dashurin e saj 17-vjeçar Tadaryl Shipp dhe një vajzë tjetër e joshi 19-vjeçaren Colleen Slemmer në një zonë pyjore. Aty Slemmer u rrah dhe u ther me thikë, ndërsa në trupin e saj u gdhend një pentagram. Prokurorët pohuan se Pike e konsideronte Slemmer rivale për shkak të djalit. Pike mori dënim me vdekje, ndërsa Shipp burgim të përjetshëm me mundësi lirimi me kusht. Vitet e fundit Pike nuk e mohonte se e kreu vrasjen.

Avokatët e saj për vite u përpoqën që dënimi t'i shndërrohej në burgim të përjetshëm pa mundësi daljeje, duke iu referuar moshës së saj në kohën e krimit, fëmijërisë së vështirë, abuzimit seksual dhe diagnozave për çrregullim bipolar dhe çrregullim të stresit posttraumatik. Guvernatori Bill Lee e refuzoi kërkesën për falje. Gjykata federale e apelit e ndali ekzekutimin rreth një orë para afatit të caktuar, por Gjykata e Lartë e SHBA-së, me votat e shumicës konservatore 6 me 3, e anuloi shtyrjen po atë ditë.

Tani avokatët u kërkojnë gjykatave që procedura të ndërpritet menjëherë dhe Pike të marrë ndihmë mjekësore. Sikur të kishte pasur sukses ekzekutimi, ajo do të ishte gruaja e parë që Tenesi e ekzekutonte në më shumë se 200 vjet. Maqedonia këtë çështje e mbylli qysh me Kushtetutën e vitit 1991. Në Tenesi ajo është e hapur edhe sot: nëse shteti nuk di të ekzekutojë as sipas rregullave të veta, mbi çfarë tjetër mbështetet dënimi me vdekje?