Në të gjitha shkollat italiane që nga sot është e ndaluar mbulimi i fytyrës. Presidenti Sergio Mattarella e nënshkroi dekretin e qeverisë së djathtë të Giorgia Melonit, ndërsa rregulli është i shkurtër: fytyrat e nxënësve duhet të mbeten të njohshme. Në praktikë kjo do të thotë fund i velove islamike që e mbulojnë plotësisht fytyrën, si burka dhe nikabi.

Por veli është vetëm titulli. Prerja më e thellë vjen nga viti shkollor 2027/2028: në vitin e parë të çdo niveli shkollimi më së shumti 30 përqind e nxënësve do të lejohen të jenë fëmijë me prejardhje të huaj që nuk flasin mjaftueshëm mirë italisht. Kuota vlen për fëmijët pa shtetësi italiane, që nuk kanë lindur në Itali dhe nuk kanë ndjekur kopsht italian të paktën dy vjet. Në shkollat e mesme, nxënësit duhet të kenë së paku tre vjet shkollim në Itali që të mos hyjnë në kuotë.

Prindërit që kanë vështirësi serioze me italishten mund të detyrohen të ndjekin kurse gjuhe, nëse kjo e vështirëson komunikimin me shkollën e fëmijës së tyre. Masat u futën me dekret urgjent, ndërsa parlamenti duhet t'i konfirmojë brenda 60 ditëve.

Pyetja të cilës dekreti nuk i përgjigjet është e thjeshtë: çfarë ndodh me fëmijën që mbetet jashtë kuotës? A do të shkojë në shkollë tjetër, në paralele tjetër, në skajin tjetër të qytetit? Fëmijët që nuk e zgjodhën as gjuhën, as vendin ku rriten, bëhen një numër në tabelë.

Italia për dekada është një nga adresat e para për njerëzit nga Ballkani që shkojnë për punë. Çdo familje që u largua me fëmijë në moshë shkollore e di si është dita e parë në një klasë ku nuk e kupton gjuhën. Nga viti 2027, ai fëmijë në Itali përveç gjuhës do të ketë para vetes edhe kuotën.

Konteksti politik është i qartë. Meloni që nga viti 2022 e udhëheq koalicionin e të djathtës ekstreme dhe konservatorëve, fitoi me premtimin për qëndrim më të ashpër ndaj migrantëve, ndërsa partia e saj Vëllezërit e Italisë (Fratelli d'Italia) vazhdon të prijë në sondazhe para zgjedhjeve që priten vitin e ardhshëm. Presioni mbi të, megjithatë, nuk vjen nga e majta, por nga edhe më djathtas: partia e re E Ardhmja Kombëtare (Futuro Nazionale) e ish-gjeneralit Roberto Vannacci kërkon qasje edhe më të ashpër ndaj migracionit. Kur e djathta garon me një të djathtë edhe më të djathtë, dikush duhet ta paguajë çmimin - e kësaj radhe në radhë janë fëmijët në bankat e shkollës.