„Proces i ndjeshëm" - me ato fjalë partia në pushtet VMRO-DPMNE i përshkruan bisedimet për rikonstruksionin e Qeverisë, gjë që në fakt do të thotë se të gjithë janë nervozë, askush nuk do të thotë çfarë fiton, e aq më pak çfarë humb. Sot e nesër partia ulet në tryezë me partnerët koalicionarë ZNAM dhe Vredi për rishpërndarjen e karrigeve ministrore.

Rikonstruksioni nuk është befasi - kryeministri Hristijan Mickoski e paralajmëroi qysh para muajsh, si diçka që vjen në gjysmë të mandatit. Bisedimet zhvillohen menjëherë pas shënimit të 36-vjetorit të themelimit të partisë në Strumicë, gjë që është gjithmonë rast i mirë që lideri të kujtojë kush është i zoti i shtëpisë para se të fillojë ndarja.

Për tani, konkretizime nuk ka. Nga Qeveria thonë se procesi është „i ndjeshëm" dhe në fazë të hershme, prandaj nuk kanë çfarë të kumtojnë - një fjali që e përkthyer në gjuhë të thjeshtë do të thotë „ende po pazarllëkojmë". Cilat ministri do të ndërrojnë pronar, cilat emra hyjnë e cilat dalin - e gjithë kjo mbetet pas dyersh të mbyllura, ndërsa qytetarët do ta marrin vesh vetëm kur marrëveshja të jetë vulosur.

Pyetja që rrallë shtrohet në rokada të tilla është më e rëndësishmja: a sjell rikonstruksioni njerëz më të mirë në vende më të mira, apo vetëm një ekuilibër të ri interesash mes partnerëve në koalicion? Ndërrimi i ministrave shitet lehtë si „freskim", por nëse logjika është aritmetikë partiake e jo aftësi, atëherë qytetarët marrin vetëm fytyra të reja mbi problemet e vjetra.