Од 1 септември, испраќањето некого на скопскиот аеродром станува работа со ограничен број обиди. Улицата пред терминалната зграда останува наменета за бесплатно кратко запирање од 10 минути за оставање и преземање патници – но само еднаш во текот на 24 часа, по возило.

Ако истата регистарска табличка се појави вторпат во истиот ден, бесплатното десетминутно застанување повеќе не важи. Контролата ќе се врши преку систем за автентификација и автоматско препознавање на регистарски таблички.

Објаснувањето на ТАВ

„Промената е насочена кон одржување непречен проток на возила и обезбедување безбедни услови за сите патници, посетители и возачи. Со автоматското препознавање на регистарските таблички ќе овозможиме ефикасно управување со пристапот, особено во периодите на пик-оптоварување со зголемена фреквенција на сообраќај“, соопштија од ТАВ Македонија.

Целта, како што се наведува, е да се спречат злоупотребите и да се намали метежот пред терминалот.

Аргументот има основа – кој се возел до скопскиот аеродром во летен пик знае како изгледа таа улица кога десетина возила стојат подолго од десет минути и чекаат некој што сè уште е во контролата.

Каде оди оној што има потреба од повеќе од еднаш

За возачите на кои им треба подолг престој, или кои во ист ден мораат повеќепати да дојдат до аеродромот, останува главниот паркинг пред терминалната зграда со 1.200 места за автомобили и шест за автобуси.

Цените таму се познати од јануари 2024 година, кога беа зголемени: 100 денари за еден час, 150 за два, 200 за три. Над три часа поскапе од 250 на 300 денари, од четири до шест часа е 400 денари, од шест до осум 500, а од осум до 24 часа 1.000 денари наместо поранешните 850. Паркирањето од три до пет дена чини 3.500 денари, од пет до седум дена 4.500, а секој нареден ден дополнителни 400.

Кој навистина ќе го почувствува правилото

Големите губитници тука не се оние што ја злоупотребувале улицата. Тоа се семејствата кои во ист ден испраќаат еден и пречекуваат друг патник, и таксистите и приватните превозници кои по природа на работа доаѓаат неколку пати дневно.

За нив новата сметка е едноставна: втор долазок значи 100 денари минимум, дури и ако престојот трае три минути.

Технолошки, решението е современо и работи. Прашањето кое ТАВ не го одговори е дали постои исклучок за превозниците кои со тоа се занимаваат, или сите ќе ја плаќаат истата цена за организациски проблем што не го создале тие.