Воената операција на Соединетите Американски Држави во Венецуела, која резултираше со апсење на претседателот Николас Мадуро и неговата сопруга, предизвика силни реакции ширум светот – од остри осуди и повици за почитување на меѓународното право, до ретки изрази на поддршка за потегот на Вашингтон.

Воената акција на САД во саботата, опишана од американскиот претседател Доналд Трамп како „спектакуларна операција каква што светот не видел од Втората светска војна“, ја стави Венецуела во центарот на глобалната политичка сцена. Според најавите од Белата куќа, Николас Мадуро и неговата сопруга ќе бидат префрлени во Њујорк, каде ќе се соочат со федерални обвиненија.

Реакциите од меѓународната заедница беа брзи и поделени. Венецуелската влада ја осуди акцијата како „исклучително сериозна воена агресија“ и прогласи вонредна состојба во земјата.

Русија побара итно ослободување на, како што го нарече, „легално избраниот претседател на суверена држава“, додека Кина изрази „длабок шок“ и ја осуди употребата на сила против Венецуела. Иран, Мексико, Бразил и Куба ја оценија американската интервенција како грубо кршење на суверенитетот и опасен преседан во меѓународните односи.

Европските реакции беа претежно воздржани и критички. Франција и Европската Унија повикаа на почитување на меѓународното право и деескалација, додека Велика Британија нагласи дека не била вклучена во операцијата и побара време за утврдување на фактите. Шпанија понуди посредување со цел мирно решавање на кризата.

Во редок случај на поддршка од Европа, италијанската премиерка Џорџија Мелони ја оцени акцијата како „легитимна и одбранбена“, додека Израел ја поздрави интервенцијата, нарекувајќи ги САД „лидер на слободниот свет“.

Од регионот, Косово и Албанија јавно ја поддржаа американската операција, а министерот за надворешни работи на Северна Македонија, Тимчо Муцунски, изјави дека земјата стои „зад САД и венецуелскиот народ во борбата за слобода и демократија“.

Генералниот секретар на Обединетите нации, Антонио Гутереш, предупреди дека ваквите акции можат да создадат опасен преседан и ја повика меѓународната заедница на воздржаност.