Британскиот парламент изгласа закон кој на сите родени по 1 јануари 2009 година трајно им забранува купување цигари. Законот создава „генерација без чад” – буквално. Ако си роден во 2009 или подоцна, никогаш во животот нема легално да купиш цигара.

Бројките зад одлуката се брутални: 400.000 хоспитализации и 64.000 смртни случаи годишно само во Англија заради пушење. Националната здравствена служба троши околу 3 милијарди фунти за лекување на болести поврзани со тутун. Вкупните општествени трошоци се проценуваат на 21 до 28 милијарди фунти годишно – најмногу од загубена продуктивност.

Законот носи и нови правила за е-цигарите: забрана за користење во автомобили со деца, на игралишта, во училишни дворови и на влезови во болници. Надвор од болниците сè уште може – за оние кои се обидуваат да престанат.

Нов Зеланд воведе слична генерациска забрана во 2022, но ја укина наредната година под нова влада. Малдивите донесоа споредлив закон во 2025 за родените во 2007 или подоцна. Дали британскиот закон ќе преживее промена на власт – тоа е прашање за идните парламенти. Но сигналот е јасен: тутунската индустрија губи пазар по пазар.